ꈎꈻꆪꊛꇁ ꆀꃅꈎꏅꌦꀐ

ꁱ：ꊈꀘꃅꇢ

ꀘ：ꐚꑕꒈꎆ

ꃅꈎꊰꅩꈓ，ꃅꆪꊰꑋꆪ，ꀋꋓꀋꉪꄷꆏꆀꃅꈎꏅꂶꌠꑌꑟꇀꌦꀐꅊꇈ， ꀋꋓꀋꉪꄷꆏꎸꉘꋚꌗꅐꇁꁡꇤꁊꄮꑟ，ꌗꃅꏢꏽꈎꏅꀉꁌꉙꄮꑟꇀꌦꀐꌠꉬꅊꇈ。ꀋꋓꀋꉪꃅꇁꌊꌠꆗꎧꏸꑵꄮꑟ，ꑮꆜꃮꃶꋴꄮꑟ，ꀉꑳꃮꑭꇂꈪꈩꄮꑟꇀꌦꀐꌠꉬꅊꇈ。ꀉꑳꉌꇿꑓꇿꃅꈎꏅꀚꑔꁦꄮꑟꇀꌦꀐꌠꉬꅊꇈ，ꆃꎬꃅꄷꊿꋆꉌꃀꈜꀕꁨꐞꄑ、ꉌꃀꊷꆣꀕ。

ꆃꎬꃅꄷꀋꂪꋋꇅꇬꆏ，ꈎꈤꇀꆏꈎꏅꇀꎂꀕ，ꆪꈤꇀꆏꄔꊒꇀꎂꀕ.ꈎꏅꇁꀐꄸꄉ，ꆺꑳꀉꄉꆹꃪꌉꅜꃅꀸꌠꑌꏠꌦꉜꌦꃅꏠꌌꄧꐯꄧꃅꄉꈍꑍꃢꉜꀋꐙ，ꆺꑳꀉꂿꑌꈎꏅꃮꀠꂶꌠꑌꃮꋚꄐꌦꃅꄐꌋꋆꐯꋆꃅꈍꑍꃢꉜꀋꐚꀐ。ꄚ，ꌺꇖꈧꌠꉷꃅꇓꈓꎆꎹꋚꈹꁧꇬꀱꉈꑴꆀꃅꈎꏅꇁꄎꄏꑌꀋꐚ，ꀉꄉꂶꌠꑳꉎꑌꄉꀧꃅꑳꅝꌺꇖꈧꌠꇁꉚꐺ，ꀉꂿꂶꌠꑌꑳꂿꑌꄉꑱꍹꀉꑳꈧꌠꇁꉚꐺ，ꉜꀕꑓꏣꈘꑌꇬꀁꇬꑟꀋꇁ。ꁦꀑꁧꄩꌩꏾꇓꏾꊰ，ꌩꏾꏋꄹꊰꌩꑭꅞ，ꃰꌦꉐꌦꑌꌵꇁꂯꇱꄉꀐ，ꉌꃀꈜꀕꐂꀕꁏ。

   ꄚꀿꃀꈧꌠꉘꀋꇉꃅꈨꇁꇬꆏ，ꌺꇖꈧꌠꎆꎹꎆꐛ，ꋚꎷꋚꊊꃅꀱꉈꑴꀿꃀꇱꄉꈎꏅꇁꀐꅊꇈ，ꀿꃀꈧꌠꋋꇅꇬꆏ，ꌩꏾꇓꏾꏂ，ꃰꌦꉐꌦꌵ，ꃅꌗꈺꄂꀕꑴꇬ，ꃅꌗꑌꁦꉘꀕꃅꐙ，ꉌꂵꑌꇗꄃꀕ，ꉌꃀꑌꈜꀕꇈꊷꆣꀕꀐ。

   ꆺꑳꀿꃀꑌꌺꇖꏮꏑꏿꄷꆏ，ꄚꋋꑌꈎꄐꄉꈎꏅꆪꄐꄉꄔꊒꀐꌠ，ꈀꄸꑌꉌꇿꑓꇿꃅꄐꏤꄉꈎꏅꐺꌐ，ꀉꁌꄐꏤꄉꋐꃀꄃ，ꀊꂵꄐꏤꄉꑷꌩꐺ，ꀉꄉꑌꄐꏤꄉꅅꃅꏠ，ꀉꂿꑌꄐꏤꄉꒉꇸꒈꀮꋌꐹꌦꀐ，ꋋꑌꒈꑌꒉꄷꄉ，ꐭꑌꐭꄷꎭ。

   ꈎꏅꇁꇬꆏꆺꑳꀉꄉꌩꏓꒉꇸꈎꏅꌩꃅꏒ，ꋬꂻꈨꑌꃅꄉꏓ。ꆺꑳꀉꂿꑌꋙꃅꒉꑽꌠꑌꈎꏅꋚꃅꀕ，ꊿꇬꋬꂻꃅꄉꃅ。ꀋꃅꎼꈎꑌꈎꄐꃮꉘꄉ，ꆪꄐꎧꏿꄉ，ꑍꄐꋚꃅꄈꌦꀐ，ꇤꈏꃆꄔꏥꄉꊷꆣꀕꇀꌦꀐ，ꑷꈐꄄꀱꂾꃚꇖꈭꀕꇀꌦꀐ，ꋋꑌꈎꏅꃮꀞꒃꇀꌦꀐ，ꎼꈎꃮꏸꃮꆜꀖꄉꉜꇬꑌ，ꈜꀕꇈꏸꎔꃀꆏꏂꑴꋐ，ꆜꎔꂶꏾꁌꑴꌦꋐ。

   ꈎꏅꌕꑌꋠꇁꅝꅍꐥ，ꄔꊒꌕꑍꈩꇁꀜꅍꐥ，ꄚꈎꏅꇁꑠꊪꌧꈩꁉꈩꇬ，ꉂꏣꑖꈈꀕꇁꌠ，ꉂꅇꄎꌬꀕꇁꌠ，ꈎꃅꆪꌒꇣꋦꐼꇉꀕ，ꑍꃅꉖꌒꆲꏂꂱꇬꀕ，ꈎꏅꇁꑠꑍ，ꌗꃅꏢꏽꈎꏅꀉꁌꉙ，ꊿꇬꋬꂻꑌꑿꀻꎆꇁ，ꎆꎹꎆꐛꋚꎷꋚꊊꇁ，ꁍꑘꋙꋦꆿꍯꂷꌵꇁ。ꉪꊈꆀꌺꈀꄸꑌꏄꅉꎔꅉꑟꇁ，ꊫꂫꎵꑳꀕ，ꐥꐨꁤꇅꀕꅊꇈ，ꄚꇬꄉꉌꈯꑓꈜꉌꇿꑓꇿꃅꆀꃅꈎꏅꂷꋨꊒꌦꀐꆺ！